Fræðsla sem undirbýr fólk fyrir það sem skiptir máli

Ég er gift, fjögurra barna móðir og amma fimm barnabarna. Ég er menntaður þroskaþjálfi og starfa sem ráðgjafarþroskaþjálfi á skrifstofu menntasviðs í sveitarfélagi, þar sem við þjónustum grunnskóla og leikskóla bæjarins.

Í hjáverkum held ég fyrirlestra og námskeið um málefni sem henta öllum aldursstigum. Ég kenni einnig skyndihjálp, fyrstu hjálp, Öryggi og björgun og sálræna skyndihjálp fyrir Rauða krossinn.

Ég hef víðtæka reynslu af því að þjónusta fólk með sérþarfir og stuðningsþarfir af ýmsum toga á öllum aldri, allt frá leikskólabörnum til eldra fólks, og af vinnu með krefjandi hegðun. Ég starfaði í 16 ár sem þroskaþjálfi á heimili fyrir geðfatlaða, hef verið ráðgjafi í barnavernd og á barna- og fjölskyldusviði, sinnt kennslu og stuðningi í grunnskóla, verið sérkennslustjóri í leikskóla og dagmamma og unnið í félagsmiðstöð og á elliheimili. Í björgunarsveit sinnti ég einkum fyrstu hjálp, sálrænum stuðningi og aðgerðamálum og er menntaður aðgerðastjórnandi.

Ég er mikil sundkona og elska að vera úti í náttúrunni. Allir þessir vinnustaðir hafa gefið mér dýrmæta reynslu og þekkingu sem ég vona að ég nái að fanga í góða fræðslu til ykkar.

Ég er giftur, fjögurra barna faðir og afi fimm barnabarna. Ég er menntaður slökkviliðsmaður og bráðatæknir og hef starfað sem slíkur í að verða 30 ár.

Ég er leiðbeinandi í sérhæfðri endurlífgun (ALS og ILS) og virkur í kennslu á því sviði, og kenni auk þess mikið fyrir Sjúkraflutningaskólann. Ég hef verið skyndihjálpar- og fyrstuhjálparleiðbeinandi hjá Rauða krossinum í mörg ár og er leiðbeinandi í Öryggi og björgun og sálrænni skyndihjálp.

Á mörgum árum í björgunargeiranum hef ég öðlast mikla reynslu, réttindi og þekkingu, meðal annars í fyrstu hjálp, rústabjörgun, sjóbjörgun, sálrænni skyndihjálp og aðgerðastjórnun.

Ég hef einnig tekið að mér námsefnisgerð og sett upp námskeið eftir þörfum hvers hóps, til dæmis endurmenntun heilbrigðisstarfsmanna.